Paj huam1

Nco Hluas Nkauj Hmoob

Ntshe yog kuv                                 nyiag nyiam koj lawm
Txhua sij hawm                              kuv thiaj pheej nco
Pw txhua hmo                                 thiaj npau suav txog
Tias tau nrog                                   koj nyob ua ke
Xav tias ntshe                                 nws yog tiag tiag
thaum tsim kiag                             cas yog npau suav
Cas kuv yuav                                   lam lem ua luaj
Koj lam tuaj                                     tso dag ua si
Kuv cia li                                           ua neeg vwm ntsuav
Ua npau suav                                  pom koj txhua hmo
Xyov yuav nco                                 koj txog hnub twg
Ntshai ruj rwg                                tsam muaj ib hnub
Koj tsis pub                                      kuv no nco koj
Koj ho ploj                                       khiav ncaim kuv mus
Koj lo lus                                          ntshe yuav tsis hnov
Thaum ntawv xyov                        haj yam yuav nco
Ntshe thaum no                             yuav kho kuv siab
Noj tshuaj iab                                 los ntshe tsis kaj
Ntshe yuav laj                                 nyiaj txoj kev mob
Ntshe yuav nyob                            ua neeg crazy
Twb yog vim                                    nco koj ib leeg
Koj tsis ntseeg                                los tsis ua cas
Vim yav tas                                      yeej nyiam koj tiag
Thiaj li nyiag                                   koj nplooj siab cia
Tsis zoo qhia                                   tias nco koj heev
Thiaj muab seev                             ua paj huam xwb
Ntshe koj twb                                  yeej tsis paub txog
Tias koj yog                                      tus neeg kuv nco
Yog koj ho                                        tsis nyiam kuv tag
Tsis txhob dag                                 hais tias koj hlub
Tsam lwm hnub                             koj ho hloov siab
Pom tus tshiab                               ces koj hais tias
Koj lam ntxias                                ci zeb kuv zov
Thaum no xyov                               yuav ua li cas
Ntshe yuav tas                                txoj kev cia siab
Tawm ntuj tshiab                          rov txog ntuj no
Ntshe yuav nco                               koj mus ib txhis
Txawm koj tsis                               ntseeg kuv kav liam
Yog lwm tiam                                  ho rov ntsib koj
Mam li coj                                        koj nrog kuv nyob
Kom kuv txhob                               nco nco koj lawm
Tab yog txawm                               tiam no tsis tau
Mam muab sau                              rau kuv lub siab
Yug dua tshiab                               los nrhiav koj dua
Mam nco txhua                              kom kuv zoo nraug
Kom koj qaug                                  nco kuv ib yam
Seb puas xam                                  kuv txoj kev nco
Vim hnub no                                   kuv nco koj tshaj
Thiaj sau zaj                                    paj huam ntawm no
Tias kuv nco                                    koj tiag tiag os………

01 / 11 / 2009

Sau Npe: Tswb (Choj Thoj)